Lənkəran Şəhər İcra Hakimiyyəti (ŞİH) tərəfindən şəhər yollarının asfaltlanması istiqamətində mütəmadi addımlar atılır. Xəbər24.medianın məlumatına görə, şəhərin təmirə ehtiyacı olan küçələri ayrılmış büdcəyə uyğun olaraq növbəlilik əsasında asfaltlanır.

Son bir neçə gündə daha 7 küçədə asfaltlanmaya həyata keçirilib. Bunlar Vaqif Hüseynov, Tofiq İsmayılov dalan 3, Şahin Məmmədov, Əliağa Vahid, Mirzə Fətəli Axundov, Kələntərlilər və Mirsalayev küçələridir. Bu siyahıya son iki gün ərzində daha 5 küçə də əlavə olunub. Belə ki, Şəhidlər Xiyabanı döngə 3, şəhid Vüsal Quliyev, Nəsirli dalan 2, Vaqif Məmmədov və Tofiq İsmayılov döngə 2 küçələrində asfaltlanma aparılıb.

Qeyd edək ki, ilkin mərhələdə ümumilikdə şəhərin 12 küçəsinin asfaltlanması həyata keçirilib, 26170 kv.m əraziyə isti asfalt döşənib. İlin sonunadək davam edəcək asfaltlanma prosesində daha 9 küçənin asfaltlanması nəzərdə tutulub.