Vətən müharibəsi şəhidi Babək Mahmudlunun xatirəsinə həsr olunmuş yunan-Roma güləşi üzrə açıq birincilik keçirilib. Astara, Lənkəran, Masallı, Cəlilabad, Salyan, Sabirabad, Bakı ("Arena"), Şirvan, Qusar, Gəncə və Biləsuvar komandalarının ümumilikdə 100-dən artıq idmançısı turnirdə birinçilik uğurunda gərgin və maraqlı mübarizə aparıb.

Xəbər24.medianın məlumatına görə, turnirdə Biləsuvar Rayon İcra Hakimiyyətinin başçısı Faiq Qürbətov, Şirvan-Salyan Regional Gənclər və İdman İdarəsinin rəisi Aydın Yusifov, YAP Biləsuvar rayon təşkilatının sədri Kamil Qurbanlı, Şirvan-Salyan Regional Mədəniyyət İdarəsinin rəis müavini Emin Mustafayev, Azərbaycan Güləş Federasiyasının nümayəndəsi Tural Əliyev, rayonun hüquq-mühafizə orqanlarının rəhbərləri və rayon sakinləri iştirak ediblər.

Azərbaycan Respublikasının Dövlət Himninin səslənməsi və şəhidlərin xatirəsinin bir dəqiqəlik sükutla yad edilməsi ilə başlanan tədbirin açılış mərasimində çıxış edən Biləsuvar Rayon İcra Hakimiyyətinin başçısı Faiq Qürbətov və digər natiqlər Azərbaycanın ərazi bütövlüyümüz uğrunda Vətən müharibəsində gənclərimizin göstərdiyi rəşadətlərdən söz açıb. Bildirilib ki, Biləsuvar rayonundan da yüzlərlə gəncin könüllü olaraq 44 günlük savaşda qəhrəmancasına döyüşmüş, 69 nəfəri şəhidlik zirvəsinə yüksəlib. Onlardan mərd, mübariz igidimiz Babək Mahmudlu da Vətən yolunda döyüşərək şəhidlik zirvəsinə ucalıb. Keçirilən bu yarış da Babək Mahmudlunun timsalında bütün şəhidlərimizə həsr olunur.

Çıxışlardan sonra şəhidlərimizin həyatını və döyüş yolunu əks etdirən videoçarx nümayiş olunub. Yaş qrupları üzrə keçirilən qarşılaşmanın final mərhələsindən sonra qaliblər mükafatlandırılıb. Qalib idmançılara diplom, medal və qiymətli hədiyyələr təqdim edilib.